Болгар улсын “Атака” намын тэргүүн В.Сидоров парламентын чуулганы хурлын үеэр Европын Холбооны гишүүн орнуудын удирдлагуудыг Оросын эсрэг тавьсан “утгагүй тэнэг” хоригийг цуцлахыг уриалсан байна.
Тэрбээр парламентын хуралдаанд оролцсон Европын орнуудын Элчин сайд нарт өөрийнх нь үгийг улс орныхоо тэргүүнд дамжуулж өгөхийг хүссэн гэнэ. Түүний үзэж байгаагаар хориг арга хэмжээ нь Европын Холбооны улс орнуудын эдийн засагт хохирол учруулж байгаа учраас яаралтай цуцлах хэрэгтэй аж.
В.Сидоров хэлэхдээ Болгар улс түүхэндээ Оростой зарласан дайнд хоёр удаа оролцсон бөгөөд дайн дуусах бүрт “үндэсний сүйрэл”-тэйгээр үлдсэн гээд “Улс орныг минь чөлөөлөгч Оростой бид ямар ч дайн зарлахыг хүсэхгүй байна. Гурав дахь удаагаа хэрхэвч болохгүй” хэмээжээ.
Түүнээс гадна Болгарын улстөрч “Европын Холбооны орнуудын төрийн тэргүүнүүд өөрийн улс орны ашиг сонирхлыг хамгаалсан улстөрийн бодлого явуулж эхлэх ёстой. Вашингтонтой харилцахдаа аяыг нь дагасан “хараат” байдлаа зогсоох хэрэгтэй. Европ тивийн эрхэмсэг ард иргэд чадварлаг лидерүүдтэй байх ёстой хэдий ч өнөөгийн Европын Холбоо иргэдийнхээ төлөө бодлого явуулахгүй байна. Холбооноос ард иргэдийн сайн сайхны төлөө бус ашиг сонирхлынх нь эсрэг бодлого явуулж байгаа. Тиймээс холбооны улстөрийг шинэчлэх ёстой” хэмээн тэмдэглэсэн байна.
Ташрамд дурьдахад, 2005 онд байгуулагдсан “Атака” нам нь үндэсний эрх ашиг, хараат бус статусыг хамгаалахын төлөө ажилладаг бөгөөд Болгар улсыг НАТО, Европын Холбооны гишүүнчлэлээс татгалзахыг уриалдаг аж. Түүнчлэн тус нам Болгар-Оросын харилцааг хөгжүүлэхийн төлөө идэвхтэй ажлууд зохион байгуулдаг.
ОХУ, барууны орнуудын харилцаа Украйны нөхцөл байдалтай холбоотойгоор хурцдаж эхэлсэн. Орос нь Крымийг нэгтгэсний дараа АНУ, Европын Холбоо нь Украины тусгаар тогтнол, нутаг дэвсгэрийн бүрэн бүтэн байдалд хөндлөнгөөс оролцсон хэмээн ОХУ-д есөн багц хориг арга хэмжээ авсан юм.
Хоригт Оросын банк санхүү, газрын тосны үйлдвэрлэл, эрчим хүч, батлан хамгаалах, компаниуд зэрэг эдийн засгийн чухал салбаруудыг багтаажээ. ОХУ хариу хоригийг өнгөрсөн наймдугаар сарын эхээр авч АНУ, Европын Холбооны гишүүн орнууд, Канад, Австрали, Норвеги улсаас хөдөө аж ахуй, хүнсний бүтээгдэхүүн импортлохоо зогсоосон.
Тиймээс Франц, Итали, Герман зэрэг улсын фермерүүд бүтээгдэхүүнээ борлуулах зах зээлгүй болсноос алдагдалд ороод байгаа. Францын фермерүүд засаг захиргааны байрны гадаа жагсаал хийх, ургацаа хаях зэргээр эсэргүүцлээ илэрхийлжээ. Европын Холбооноос фермерүүдэд нөхөн төлбөр олгохоо амласан аж.
Түүнээс гадна Брюссель ОХУ-д тавьсан хоригийг цуцлах талаар аравдугаар сарын сүүлчээр хэлэлцэхээ мэдэгдэж байсан.
Гэвч эх сурвалжийн мэдээлснээр Европын холбоо ирэх 2015 оны гуравдугаар сарын дундуур хоригийн асуудлыг хэлэлцэхээр шийдсэн гэнэ. Харин АНУ Украйны нөхцөл байдал сайжрахгүй, Донецк, Луганскт зэвсэгт мөргөлдөөн гарч байгаа тул Оросын эсрэг хоригийг чангатгах санал тавьжээ.
Европын Холбооны улсуудын тухайд хоригийг дахин чангатгахын тулд нэгдсэн байр суурьтай байх шаардлагатай.