Торонтогийн дарга баяраа архигүй тэмдэглэнэ
Канадын томоохон хотын нэг Торонтогийн мэр Роб Форд элдэв шуугианд нэр холбогдох дуртай нэгэн.
Тэрбээр жил бүр хотын иргэдээ цуглуулан “Форд-фест” нэртэй баяр зохиодог.
Дуу хөгжмөөс гадна ил гал дээр мах шарж нийтээрээ наргиж цэнгэдэг баяраа энэ удаа хотынхоо хамгийн том цэцэрлэгт хүрээлэнд ямар ч архи дарсгүйгээр тэмдэглэхээр болжээ.
Гэхдээ энэ нь хотын даргын санаачилгаар биш. Нийтийг хамарсан энэ арга хэмжээнд спиртийн төрлийн ундаа хэрэглэхийг Хотын архи болон мөрийтэй тоглоомын асуудлаарх комисс зөвшөөрөөгүй гэнэ.
“Форд-фест”-д Торонтогийн иргэд олноороо цугладаг. Хэдийгээр улс төрөөс ангид баяр гэх ч өмнөх жилүүдийн “Форд-фест”-ийн нээлтээр хотын дарга өөрийнхөө ажлыг тайлагнан том илтгэл танилцуулдаг байсан нь түүнийг баяраар далимдуулан сонгуулийн өмнөх шоугаа хийх нь гэх хардлагыг өрсөлдөгчдөд нь төрүүлээд байгаа аж.
Тэгээд ч Роб Фордыг шоучин, хатуу сархад зооглон хөлчүүрсэн үедээ элдэв хэрэгт орооцолдомтгой гэдгээр нь Канадаар зогсохгүй мэддэг юм.
