Цэцэрлэгжүүлэгчдийн улсын анхдугаар зөвлөгөөний хөтөлбөр

БОНХЯ “Монголын Цэцэрлэгжүүлэгчдийн мэргэжлийн байгууллагуудын нэгдсэн холбоо” ТББ-тай хамтран өнөөдөр Цэцэрлэгжүүлэгчдийн улсын анхдугаар зөвлөгөөнийг МҮЭСТО-ны Бага танхимд зохион байгуулж байна. 

Монгол Улсын хүн амын болон үйлдвэр, аж ахуйн газруудын төвлөрөл ихэссэнээс нийслэлийн ногоон байгууламж, экологийн үнэ цэнэ буурч, төрөөс баримтлах тодорхой бодлогогүйгээс цэцэрлэгжүүлэх ажил үр дүнгүй болсоор байна.

Улмаар нэг хүнд ноогдох ногоон байгууламжийн хэмжээг 20м2 нэмэгдүүлэх зэрэг тодорхой зорилтуудыг УИХ-ын Шинэ бүтээн байгуулалт дунд хугацааны хөтөлбөрт тусгасан байдаг.

Мөн Монгол Улсын Ерөнхийлөгчийн аймаг бүрт цэцэрлэгт хүрээлэн байгуулах, бүх нийтээр мод тарих үйл ажиллагааг зохион байгуулах тухай зарлигууд бий.

Монгол Улсын хувьд ногоон байгууламжийн ажлыг зөвхөн нийслэл хотын асуудал мэтээр ойлгогддог цаг үе өнгөрч аймаг, орон нутагт хот суурин газрын төлөвлөлттэй уялдсан цэцэрлэгт хүрээлэн, ногоон байгууламжийг мэргэжлийн түвшинд гүйцэтгэх шаардлага зүй ёсоор тулгарч байгаа билээ. 

Жишээ нь, жил бүр зохион байгуулдаг бүх нийтээр мод тарих өдрөөр иргэд, аж ахуйн нэгжийн оролцоотой тарьсан мод, бутыг арчлах, хамгаалах зардалгүйгээс устаж үгүй болсоор өнөөдөр хийсэн ажлын үр дүн тухайн жилдээ л үгүй болдог уламжлалтай боллоо.

Өөрөөр хэлбэл “субботник”-ийн зарчмаар цэцэрлэгжүүлэлт хийдэг арга барилыг өөрчилж төрийн болон сайн дурын хандивын хөрөнгийг үр дүнтэй зарцуулах шаардлагатай. 

Иймд цэцэрлэгжүүлэлт, ногоон байгууламжийн чиглэлээр ажилладаг төрийн болон мэргэжлийн байгууллага, иргэд, сайн дурын бүлэглэлүүдийн оролцоог хангасан мэргэжлийн түвшний үйл ажиллагаа явуулахад тулгарч байгаа асуудлуудыг хэлэлцэх зорилгоор Цэцэрлэгжүүлэгчдийн улсын анхдугаар зөвлөгөөнийг зохион байгуулах гэж байна. 

Зөвлөгөөнөөс холбогдох төрийн болон мэргэжлийн байгууллагуудад хүргүүлэх зөвлөмж, олон нийт, ард иргэдэд хүргүүлэх уриалга гаргах юм. 

Хэлэлцэх асуудал

1. Төрөөс ногоон байгууламж, цэцэрлэгжүүлэлтийн талаар баримталж буй бодлого
2. Хот суурин газрын ногоон байгууламж, цэцэрлэгжүүлэлтийн ажилд тулгамдсан асуудлууд, шийдвэрлэх арга замууд 
3. Шинжлэх ухааны дэвшилтэт техник технологийг ногоон байгууламж, цэцэрлэгжүүлэлтийн үйл ажиллагаанд нэвтрүүлэх

Цэцэрлэгжүүлэгчдийн улсын анхдугаар зөвлөгөөний хөтөлбөр

09.30-10.00 Бүртгэл 

НЭЭЛТ

10.00-10.15  Нээлтийн үйл ажиллагаа

10.15-10.25  Байгаль орчин, ногоон хөгжлийн яамны төрийн нарийн бичгийн дарга           
Ж.Батболд үг хэлнэ

ИЛТГЭЛ

10.30-10.40  Байгаль орчин, ногоон хөгжлийн бодлогод ногоон байгууламж, цэцэрлэгжүүлэлтийн талаар тусгагдсан байдал
Илтгэгч: БОНХЯ-ны Ногоон хөгжлийн бодлого төлөвлөлтийн газрын мэргэжилтэн М.Ганбат 

10.40-10.50  Хот байгуулалтын бодлогод цэцэрлэгжүүлэлт, ногоон байгууламжийн талаар тусгагдсан байдал
Илтгэгч: БХБЯ-ны Стратегийн бодлого, төлөвлөлтийн хэлтсийн ахлах мэргэжилтэн Д.Бэлэгсайхан

10.55-11.20  Хот суурин газрын ногоон байгууламж, цэцэрлэгжүүлэлтийн ажилд тулгамдсан асуудлууд, шийдвэрлэх арга замууд
Илтгэгч: МЦМБНХ-ны удирдах зөвлөлийн гишүүн, Цэцэрлэгжилт ХХК-ийн захирал Ө.Магсаржав

11.20-11.25  Хүндэтгэлийн зураг татуулах

11.25-11.50  Цайны завсарлага, үзэсгэлэнтэй танилцах

12.00-12.15  Ургамлын интродукциас ногоон үйлдвэрлэлд
Илтгэгч:  Ботаникийн хүрээлэнгийн Эрдэмтэн нарийн бичгийн дарга   Л.Энхтуяа

12.15-12.30 Ногоон байгууламжийн бодлого, төлөвлөлтийн загварчлал, хууль эрхзүйн асуудалд
Илтгэгч:  МЦМБНХ-ны ерөнхийлөгч Ц.Бямбасүрэн

12.30-13.50  Үдийн хоол

ХЭЛЭЛЦҮҮЛЭГ

14.00-15.30   Зөвлөмжинд тусгах саналын хэлэлцүүлэг

ХААЛТ

15.30-16.00  Зөвлөгөөнөөс гарсан зөвлөмж, уриалгыг батлах.