Гемофилтэй хүүхдүүдийн ар гэрийнхэнд мэдээлэл өгч, санал солилцов

Жил бүрийн дөрөвдүгээр сарын 17-ны өдрийг “Гемофилитэй тэмцэх дэлхийн өдөр” болгон тэмдэглэн өнгөрүүлж ирсэн. Энэхүү өдрийг дэлхийн улс орнуудад 1989 оноос эхлэн тэмдэглэж ирсэн бөгөөд Монголд 2003 оноос эхлэн тэмдэглэдэг болсон билээ.

ЭМЯ-наас 2014 оныг “Эх, хүүхдийн эрүүл мэндийг дэмжих жил” болгон зарласантай холбогдуулан Гемофилитэй тэмцэх Дэлхийн өдөрт зориулан “Гемофили өвчний менежментийг сайжруулъя” сэдэвт симпозиумыг ЦССҮТ болон Монголын гемофилийн үндэсний холбоотой хамтран зохион байгууллаа.

Симпозиумыг ЭМЯ-ны Бодлогын хэрэгжилтийг зохицуулах газрын дарга Я.Буянжаргал нээж үг хэлсэн юм. Энэхүү хуралд ЭМШУИС –ийн эрдэмтэн багш нар, ЭХЭМҮТ-ийн лаборатори болон цусны клиникийн эмч нар оролцож, удамзүй, оношилгоо, факторын эмчилгээ, нөхөн сэргээх эмчилгээний талаарх мэдээллүүдийг өгсөн байна.

Гемофил нь цусны хүнд хэлбэрийн удамшлын өвчин юм.

Мөн ЭМЯ-ны Эмнэлгийн тусламжийн хэлтсийн Эмнэлгийн тусламж, үйлчилгээний чанар, аюулгүй байдлын бодлогын хэрэгжилтийн зохицуулалт хариуцсан мэргэжилтэн Э.Сүхбаатар, Цус сэлбэлт судлалын үндэсний төв, Улсын нэгдүгээр төв эмнэлгийн эмч нар болон Монголын гемофилийн холбооны гишүүд, гемофилтэй хүүхдүүдийн ар гэрийнхэн оролцож, тэдэнтэй гемофилийн үед үзүүлэх тусламж үйлчилгээг сайжруулах талаар эмч мэргэжилтнүүд санал бодлоо солилцон, мэдээлэл өгчээ.