55-65 насныханд зориулсан “Hello, My INNER child” урлагийн сэтгэл заслын хөтөлбөр эхлүүлнэ

Урлагийн сэтгэл засал судлалын үндэсний төвөөс 55-65 насныхандзориулан зориулан “Hello, My INNER child” урлагийн сэтгэл заслын хөтөлбөр явуулахаар болжээ.

Хүнд 45-60 насны хооронд биологийн өөрчлөлттэй холбоотой цэвэршилт, шилжилт явагдаж эхэлдэг. Өөрөөр хэлбэл, эрч хүчтэй залуу наснаас ахмад настан болох шилжилт тул энэ үед сэтгэл зүйн хямрал ихээр явагддаг байна. Тухайлбал, өөрийгөө хүчгүйгээр мэдэрч, бүх зүйл дууссан мэт санагдаж, төгсгөлийн тухай үе үе бодож эхэлдэг ажээ. 

Манай ахмадуудын хувьд наснаасаа эрт бүх зүйлийн төгсгөлийн тухай бодож, өөрсдийгөө сэтгэл зүйн хямралд оруулах нь харьцангуй элбэг тохиолддог байна. Энэ нь тэдний насны онцлогт тусгайлан зориулсан сургалт хөтөлбөрүүд ховор байдагтай холбоотой хэмээн тус төвөөс үзжээ. 

Тиймээс “Hello, My Inner Child” хөтөлбөрөөрөө дамжуулан амьдралын сайхныг мэдрүүлэх, амьдралын чанарыг нэмэгдүүлэх, шинэ зорилго, шинэ хоббиг бий болгох, дотоод мэдрэмжийг нь урлагаар дамжуулан илэрхийлэх зэрэг боломжуудыг олгох юм байна. Энэ хүрээнд Урлагийн сэтгэл засал судлалын үндэсний төв эхний өдөрлөгийг нэгдүгээр сарын 25-нд зохион байгуулахаар болжээ.