Ерөнхий сайд У.Хүрэлсүх Засгийн газрын гишүүдийн нэрээ УИХ-ын даргад өнөөдөр өргөн барьсан билээ. Эдгээр гишүүдийн асуудлыг Байнгын хороодын хуралдаанаар хэлэлцлээ.
Ингээд хуралдаанаас гаргасан шийдвэрийг танилцуулж байна.
Аюулгүй байдал, гадаад бодлогын байнгын хорооны гишүүд Батлан хамгаалахын сайдаар Н.Энхболдыг дэмжлээ.
Мөн Гадаад харилцааны сайдаар Д.Цогтбаатарыг дэмжсэн байна. Уг хороо нь 19 гишүүнтэй бөгөөд УИХ-ын гишүүн Ж.Энхбаяр ахалдаг.
ХХААХҮ-ийн сайдаар Б.Батзоригийг томилохыг Байгаль орчин, хүнс, хөдөө аж ахуй, эдийн засгийн байнгын хорооны хамтарсан хуралдаанд оролцсон гишүүд 92.8 хувийн саналаар дэмжлээ.
Мөн БОАЖ-ын сайдад Н.Цэрэнбатыг 96.6 хувийн саналаар дэмжжээ. Уг байнгын хорооны дарга УИХ-ын гишүүн Ц.Гарамжав бөгөөд 19 гишүүнтэй юм.
Уг байнгын хорооны хуралдаанд оролцсон гишүүд БСШУС-ын сайдаар Ц.Цогзолмааг дэмжлээ.
Эрүүл мэндийн сайдаар Д.Сарангэрэлийг дэмжсэн байна.
Нийгмийн хамгаалал, хөдөлмөрийн сайдаар С.Чинзоригийг гишүүд 100 хувийн саналаар дэмжлээ.Тус байнгын хороо нь 19 гишүүнтэй. УИХ-ын гишүүн Л.Энх-Амгалан даргалдаг.
Шадар сайдад УИХ-ын гишүүн Ө.Энхтүвшинг ажиллуулахыг Төрийн байгуулалтын байнгын хорооны хуралдаанд оролцсон гишүүд дэмжлээ.
Мөн ЗГХЭГ-ын даргад УИХ-ын гишүүн Г.Занданшатарыг томилуулах саналыг дэмжлээ.
Төрийн байгуулалтын байнгын хорооны даргаар УИХ-ын гишүүн Н.Энхболд ажилладаг бөгөөд 19 гишүүнтэй.
Төсвийн байнгын хорооны хуралдаанд оролцсон 12 гишүүн УИХ-ын гишүүн Ч.Хүрэлбаатарыг Сангийн сайдад томилуулахаар 100 хувь дэмжлээ.
Уг байнгын хороо нь 19 гишүүнтэй. Дарга нь Сангийн сайдад нэр дэвшигч Ч.Хүрэлбаатар.
Эдийн засгийн байнгын хорооны хуралдаанаар Барилга, хот байгуулалтын сайдад Х.Баделханыг томилуулах саналыг 87.5 хувийн саналаар дэмжлээ.
Мөн Зам тээврийн хөгжлийн сайдаар Ж.Бат-Эрдэнийг томилохыг Эдийн засгийн байнгын хорооны гишүүдийн 93.3 хувь дэмжлээ.
Уул уурхай, хүнд үйлдвэрийн сайдад Д.Сумъяабазарыг томилохыг 93.8 хувийн саналаар дэмжлээ.
Эрчим хүчний сайдаар Ц.Даваасүрэнг томилохыг байнгын хорооны гишүүдийн 93.8 хувь нь дэмжсэн байна. Эдийн засгийн байнгын хорооны даргаар УИХ-ын гишүүн Д.Тэрбишдагва ажилладаг бөгөөд 19 гишүүнтэй.
Хууль зүйн байнгын хорооны хуралдаанаар ХЗДХ-ийн сайдад Ц.Нямдоржийг томилохыг 60 хувийн саналаар дэмжжээ.
Хууль зүйн байнгын хороог УИХ-ын гишүүн Ш.Раднаасэд даргалдаг. 19 гишүүнтэй юм.