“Зайсан дулаан өргөө” СӨХ, “Могул таун” хотхоны оршин суугчид өнөөг хүртэл халаалтгүй байгаа асуудлаар өнөөдөр мэдээлэл хийлээ.
Тэд "Улаанбаатар хот, Хан-Уул дүүргийн 11-р хорооны Могул таун хотхоны оршин суугчид “Могулскай” ХХК-н хариуцлагагүй байдал, өр төлбөрийн маргааны улмаас тус хотхоны 350 гаруй айлын 2,000 гаруй хүний эрүүл мэнд амь нас, онц их хэмжээний эд хөрөнгө хөлдөх, улмаар цахилгааны хэт ачааллын улмаас шатах эрсдэлд ороод байна.
Хотхоны иргэд даарч бээрэхийн эрхэнд олноороо цахилгаан халаалт залгах үед цахилгааны утас, кабель, гал хамгаалагч ачаалалаа дийлэхгүй хайлж шатаж галын аюултай нөхцөлд байх боллоо.
Мухардалд орсон энэхүү асуудлыг шийдвэрлэх, иргэдийн амь нас эрсдэх, их хэмжээний эд хөрөнгө хөлдөх, шатах аюулаас нэн яаралтай сэргийлэх шийдэл нь уг магистрал шугам, ЦТП-г улсын өмчид хүлээн авах учиртай.
Гагцхүү гүйцэтгэгч компаниудад төлж барагдуулах ёстой төлбөрийн үлдэгдэл 600 сая төгрөгийг шийдвэрлэснээр улс 3 гаруй тэрбум төгрөгийн өртөг бүхий шугам, инженерийн байгууламжийг өөрийн мэдэлд авах боломж бүрдэх юм.
Ингэснээр уг шугамаас дулаан хангамжаа авдаг 4,000 гаруй хэрэглэгч дулааны найдвартай эх үүсвэрээр хангадахын сацуу эдийн засгийн тооцоо талаасаа ч дулаан хангамжийн сүлжээнээс төвлөрүүлэх орлого нэмэгдэж, дундын зуучлалын зардал танагдаж таатай нөхцөл бүрдэнэ" гэлээ.