Филадельфи Сиксерс баг залуу төвийн тоглогч Жоел Эмбийдэд тун их итгэл хүлээлгэж байгаа бололтой. Эмбийдийн хувьд бэртэл гэмтлийн асуудалтай ч баг нь түүнд 5 жилийн $148 сая долларын нүсэр гэрээ санал болгож, улмаар тохиролцоонд хүрсэн байна.
Мөн Жоел Эмбийдийн хувийн амжилтаас шалтгаалж дээрх мөнгөн дүн $178 сая доллар хүртэл өсөх боломжтой. Эмбийд бүх НБЭ-ийн багт нэрлэгдэж, улирлын шилдэг хамгаалан тоглогч эсвэл улирлын үнэ цэнэтэй тоглогчоор нэрлэгдсэн тохиолдолд урамшуулал $30 сая долларыг нэмж авах юм.
Эмбийдийн хувьд НБЭ-ийн карьертаа нийт 31 тоглолт хийсэн ч ийнхүү тоглогч бүрийн хүсдэг нүсэр гэрээг байгуулж чадлаа.
Түүний хувьд өнгөрсөн улирал цөөхөн тоглолтонд оролцсон. Гэсэн ч тэдгээр тоглолтууддаа тун үр ашигтай тоглолт үзүүлж 20.2 оноо, 7.8 самбараас бөмбөг авалт, 2.5 блокийг дунджилсан юм. Одоо бэртэл гэмтлээс хол байж, хөгжөөн дэмжигчдийнхээ хүсэн хүлээсэн амжилтыг гаргах л үлдлээ.