ФОТО: 360 мянга гаруй ном, хэвлэлийн сан хөмрөгтэй МУИС-ийн ШИНЭ НОМЫН САН
Монгол Улсын ууган их сургууль МУИС байгуулагдаж, үндэсний дээд боловсролтой мэргэжилтэн бэлтгэж эхэлсний 75 жилийн ойн баяраар МУИС нь шинэ номын сангийн нээлтийг албан ёсоор хийж, оюутан суралцагч нартаа хүлээлгэн өглөө. Нээлтийн үйл ажиллагаанд МУ-ын Ерөнхийлөгч Х.Баттулга, МУИС-ийн захирал, Доктор Я.Төмөрбаатар, БСШУС-ын сайдын үүрэг гүйцэтгэгч Г.Чулуунбаатар нар болон МУИС-ийн удирдлагууд оролцлоо.
Монгол Улсын Ерөнхийлөгч Х.Баттулга хэлэхдээ, “Би Монгол Улсын Ерөнхийлөгч болохдоо нэг сайхан номын сан байгуулж нээх юмсан гэж бодож байсан. Тэгвэл өнөөдөр МУИС 75 жилийн ойгоороо ийм сайхан номын сан нээж байгаад би их баяртай байна. Бид гаднынхны хийсэн зураг төслөөр ажил хийж, ийм болох юмсан гэж боддог байсан үе саяхан. Тэгвэл МУИС-ийн шинэ номын сангийн интерьер дизайнаас эхлээд барилга байгууламж, тавилга, бүх зүйлийг Монголын компаниуд хийсэн тухай танилцуулж байгаа нь бахархалтай байна. “Ном бол ертөнцийг харах цонх” гэж биднийг бага байхад сургасан. Одоо ч сургадаг. Цаашид ч сургах байх.
1942 онд, дэлхийн II дайны тэр хүнд үед 100 гаруйхан номтой нээгдэж байсан МУИС-ийн номын сан өнөөдөр 400 гаруй мянган номтой, стандартад нийцсэн том номын сан болж байгаад бид баярлаж бахархахгүй байхын аргагүй юм. Энэ жишгээр МУИС-иас салбарлаж гарсан олон сайхан их, дээд сургуулиуд, аймгууд стандартад нийцсэн ийм номын сантай болох болтугай гэж ерөөе” гэлээ.
2014 онд номын сангийн барилгын шавыг нь тавьж, хөрөнгө оруулалтын дийлэнхийг сургуулийнхаа нөөц бололцоогоор шийдэж, 16 тэрбум төгрөгөөр босгосон номын шинэ өргөөний 6 давхар шилэн барилга нь МУИС-ийн хичээлийн нэг, хоёрдугаар байрны голд сүндэрлэв. Аливаа их, дээд сургуулийн хөгжлийн хэмжүүр, нүүр царай бол номын сан байдаг. 75 жилийн түүхтэй МУИС-ийн Номын сан 2017-2018 оны хичээлийн жилд орчин үеийн дизайны шийдэл бүхий ая тухтай орчинг бүрдүүлсэн номын сангийн шинэ байранд нүүн орж, МУИС төдийгүй Монголын дээд боловсролын салбарын номын сангийн нүүр царай болохуйц эрдэм шинжилгээ, сургалт-судалгааны түшиц номын сан- мэдээллийн төв ийнхүү нээгдэж байна.
Номын сангийн шинэ барилгын В1 давхарт номын фонд, архив, 1-р давхарт нэг цэгийн үйлчилгээ, гэрээр ном олгох үйлчилгээ, сонин сэтгүүлийн уншлагын танхим болон музей, номын дэлгүүр Brandshop, Coffeshop, 2-4 давхарт уншлагын танхим, номзүй, ном бүрдүүлэлт, катологийн өрөө, лекцийн танхим, 5-6 давхарт судалгааны лабораториуд, хурлын танхим тус тус байрлаж байна.
Танхим бүрийн тохижилт өөр өөр загвар, өвөрмөц хэв маягтай. Байгалийн болон Нийгмийн шинжлэх ухааны төрөлжсөн уншлагын танхим, багш, судлаачдын уншлагын танхим, болон багаар ажиллах өрөөнүүдтэй. Номын сан нэгэн зэрэг 700 оюутанд үйлчлэх суудалтайгаас гадна оюутнууд суух чөлөөт орчин, тохь тухтай зай талбайг давхаруудад байгуулан ашиглалтад оруулаад байна.
Цаашид номын сангийн үйлчилгээг дэлхийн жишигт ойртуулахын тулд технологийн шинэчлэл хийх, бүрэн автоматжуулалтын RFID технологийг нэвтрүүлж, үйлчилгээг улам боловсронгуй болгох, зорилт тавин ажиллаж байна. МУИС-ийн номын сангаас өөрийн харъяалалын бус уншигчдад үйлчлэх боломжийг судалж байна. Бидэнд урд нь гадны хүмүүст үйлчлэх боломж байгаагүй бөгөөд манай номын сангаар үйлчлүүлэх сонирхолтой хүмүүс багагүй байдаг. Иймд номын сангийн ачаалалаас хамааран хэрвээ боломж олдвол биднийг зориод ирсэн гадны хүмүүст тодорхой нөхцөлтэйгээр үйлчлэх боломжийг бүрдүүлэх зорилготой байна.
Эх сурвалж: МУИС
Гэрэл зургийг MPA.mn
