2030 онд Хятад улс 50 сая тарган хүүхэдтэй болох тооцоо гарчээ

Бээжингийн Их сургуулийн судлаачдын тооцоолсноор одоогийн хандлага хэвээр хадгалагдаж, арга хэмжээ авахгүй бол Хятад улсын сургуулийн насны илүүдэл жинтэй буюу тарган хүүхдийн тоо 2030 онд 50 саяд хүрэх тооцоо гарчээ.

1985 онд тус улсын 7-18 насны илүүдэл жинтэй хүүхдийн тоо 6.2 сая байсан бол 2014 онд 35 сая болж өссөн байна.

Судалгааг удирдсан Ма Гуаншэнь “Хэрвээ арга хэмжээ авахгүй бол 2030 онд Хятад улс 50 сая тарган хүүхэдтэй болно. Нийт хүүхдүүдийн 28 хувь болохоор байна” гэж тайлбарлажээ.

Мөн хамгийн аюултай нь энэ хандлага сургуулийн өмнөх насны хүүхдүүдэд илэрч эхэлснийг тэр бас хэлсэн юм. “1985 онд сургуулийн өмнөх насны буюу 7 хүртэл насны таргалалттай хүүхдийн тоо 1.4 сая байжээ. Гэтэл өнөөдөр энэ тоо 4.8 саяд хүрсэн байна” хэмээн Ма судлаач ярьжээ.

Тоо баримтаас харвал таргалах хандлага хотын хүүхдүүдэд түлхүү, тэр дотроо охидоос илүү хөвгүүдэд илүү илэрч байгааг бас онцолсон байна.

Үүнээс болоод хүүхдүүдийн дунд цусны даралт нэмэгдэх, цусан дахь чихрийн хэмжээ нэмэгдэх өвчлөл нэмэгдэж байгаа гэнэ.

Эх сурвалж: Sina.Com