Уншиж байна ...
Зураг
Зураг
ХУУЧИРСАН МЭДЭЭ: 2017/09/20-НД НИЙТЛЭГДСЭН

Аялал жуулчлалын төслүүдийг хэрэгжүүлнэ

Ж.Хулан, iKon.mn
2017 оны 9 сарын 20
iKon.MN
Зураг зураг

-Засгийн газрын өнөөдрийн /09.20/ хуралдааны шийдвэр-

Өгийнуур, Ганга нуурын экосистемийг хамгаалан, нөхөн сэргээж тогтвортой аялал жуулчлалыг хөгжүүлэх, “Монголын эзэнт гүрэн музей” аялал жуулчлалын цогцолбор байгуулах төслүүдийг хэрэгжүүлэхийг Байгаль орчин, аялал жуулчлалын сайдын үүрэг гүйцэтгэгч Д.Оюунхоролд, төслүүдийг гадаадын хөнгөлөлттэй зээл, буцалтгүй тусламжид хамруулж санхүүжүүлэхийг Сангийн сайдын үүрэг гүйцэтгэгч Б.Чойжилсүрэнд даалгалаа.

“Монголын эзэнт гүрэн” музей, аялал жуулчлалын цогцолбор байгуулах газрын зөвшөөрөл олгохыг Нийслэлийн Засаг дарга бөгөөд Улаанбаатар хотын захирагч С.Батболдод үүрэг болголоо.

Манай улс гадаадын жуулчдын тоог 2020 он гэхэд нэг саяд хүргэх зорилт тавьсан ч жилдээ 390-470 мянга орчим жуулчин л хүлээн авч байна. Нэг сая жуулчин авч, нэг тэрбум ам.доллар олон аялал жуулчлалын дэд бүтцээ хөгжүүлэх, олон улсын тээврийн чиглэл, давтамжийг нэмэх, жуулчдад олон улсын жишигт нийцсэн, өрсөлдөхүйц бүтээгдэхүүн, үйлчилгээ бий болгохын тулд дээрх төслүүдийг хэрэгжүүлэх шаардлагатай гэж салбарын яам үзжээ. 

Төслүүд хэрэгжсэнээр орон нутагт соёл, аялал жуулчлал, үйлчилгээ бий болохын зэрэгцээ байгаль орчны тэнцвэрийг хадгалах, нутгийн иргэдийг тогтмол ажлын байраар хангах боломж бүрдэн нутаг орон ч хөгжинө гэж тооцоолж байгаа аж.

 

Эх сурвалж: Засгийн газрын Хэвлэл мэдээлэл, олон нийттэй харилцах хэлтэс