Уншиж байна ...
Зураг
Зураг
ХУУЧИРСАН МЭДЭЭ: 2017/07/23-НД НИЙТЛЭГДСЭН

Ерөнхийлөгч Х.Баттулга "Хааны Эрэлд" Олон Улсын хамтарсан сургуулийн нээлтэд оролцов

President.mn
2017 оны 7 сарын 23
President.mn
Зураг зураг
Гэрэл зургийг mpa.mn

Монгол Улсад жил бүр уламжлал болгон зохион байгуулдаг “Хааны эрэлд” энхийг дэмжих ажиллагааны олон улсын ээлжит хамтарсан сургуулийн нээлт Тавантолгой дахь Зэвсэгт хүчний сургалтын нэгдсэн төвд өнөөдөр боллоо.

Нээлтийн ёслолын эхэнд “Хааны эрэлд 2017” энхийг дэмжих ажиллагааны олон улсын хамтарсан сургуульд оролцох бие бүрэлдэхүүн бэлэн жагссаныг тус сургуулийн удирдагч дэд хурандаа Жавхланбаяр Монгол Улсын Ерөнхийлөгч, Зэвсэгт хүчний Ерөнхий командлагч Х.Баттулгад илтгэсний дараа Төрийн тэргүүн тус үйл ажиллагаанд оролцож буй 26 орны цэргийн багууд, нийт бие бүрэлдэхүүнтэй мэндчиллээ.

Монгол Улсын Ерөнхийлөгч, Зэвсэгт хүчний Ерөнхий командлагч Х.Баттулга “Хааны эрэлд 2017” энхийг дэмжих ажиллагааны олон улсын хамтарсан сургуулийн нээлтэд зориулан үг хэлсэн юм. 
 
Гэрэл зургийг mpa.mn

Тэрбээр "Эрхэм генерал, офицер, ахлагч, энхийг сахиулагчид аа!

Хүндэт зочид, төлөөлөгчид өө!

Өнөөдөр Монгол Улсын Зэвсэгт хүчин, АНУ-ын Номхон далай дахь Хуурай замын болон Тэнгисийн явган цэргийн командлал жил бүр хамтран зохион байгуулдаг “Хааны эрэлд-2017” энхийг дэмжих ажиллагааны олон улсын сургууль эхэлж байна. Энэхүү сургуульд оролцохоор  төрт ёсны хоёр мянга гаруй жилийн түүхтэй манай сайхан оронд эх орноо төлөөлөн хүрэлцэн ирсэн энхийг сахиулагч Та бүхэнд Монгол Улсын Зэвсэгт хүчний Ерөнхий командлагчийн хувьд чин сэтгэлийн талархал илэрхийлье.

Дэлхийн улс орнууд энх тайван, тогтвортой байдлыг бэхжүүлэх талаар хүчин чармайлт  гарган, аливаа маргаантай асуудлыг эвийн аргаар шийдвэрлэхийг эрмэлзэж тодорхой үр дүнд хүрч байгаа хэдий ч шашин хоорондын  сөргөлдөөн, үймээн самуун, терроризм, хүний болон байгалийн хүчин зүйлээс үүдэлтэй  аюул занал  та бидний санааг зовоосоор байна.

Монгол Улс дэлхийн хамтын нийгэмлэгийн гишүүн орны хувьд даян дэлхийн энх тайван, аюулгүй байдлыг бэхжүүлэх үйлсэд тодорхой үүрэг, хариуцлага хүлээж байдгийн хувьд Монгол Улсын Зэвсэгт хүчний бие бүрэлдэхүүн НҮБ-ын энхийг дэмжих ажиллагаанд  санаачилга гарган идэвхтэй оролцож, хүлээсэн  үүргээ нэр төртэй гүйцэтгэж ирлээ.

 
Гэрэл зургийг mpa.mn

Монголын Зэвсэгт хүчний бие бүрэлдэхүүн олон улсын энх тайван, аюулгүй байдлыг хангах үүрэг бүхий НҮБ-ын энхийг сахиулагчид та бүхэнтэй мөр зэрэгцэн олон улсын сургуулилтад оролцож, харилцан суралцаж, энхийн үйлсэд өөрийн хувь нэмрээ оруулж байгаад Монгол Улсын төрийн тэргүүний хувьд сэтгэл хангалуун байна.   

Монголын Зэвсэгт хүчин дэлхий нийтийн энх тайван, аюулгүй байдлын асуудлаар хөндлөнгөөс байр  сууриа  илэрхийлэх төдий бус  хүнд бэрх, хэцүү бүхнээс үл шантран энхийн  үйл ажиллагаанд  биечлэн оролцож, чадах бүхнээ хийхийг  чухалчилж ирсэн.

Цаашид Монгол Улс дэлхийн хамтын нийгэмлэгийн бүрэн эрхт гишүүн, энхийг эрхэмлэгч улс гэдгээ нотлон харуулж, даян дэлхийн энхтайван, аюулгүй байдлыг сахин хамгаалах үйл ажиллагааг ямагт дэмжиж,  уламжлалт бодлого, чиглэлийг тууштай баримтлах болно.

Энхийг дэмжих ажиллагаанд оролцдог  монгол  цэргийн баг, бүрэлдэхүүн дэлхийн халуун цэгүүдэд амар тайван  байдлыг сахиулах, шинэ  сэргэг тусгаар улсуудын  ард түмний нийтлэг эрх ашгийг хамгаалах, тусгаар тогтнол, ардчиллыг бэхжүүлэхэд  амжилттай оролцож байна. Энэ нь Монгол Улсын тусгаар тогтнол, оршин тогтнохын аюулгүй байдлыг баталгаажуулахад чухал ач холбогдолтой гэж миний бие үзэж байна.

“Хааны эрэлд-2017” олон улсын сургууль манай энхийг сахиулагчдын  мэргэжлийн ур чадвар, сахилга зохион байгуулалт, мэдлэг, ур чадвар,  дадлага туршлага, тэсвэр хатуужлыг дээшлүүлэхэд өндөр үр дүнтэй сургалт болно гэдэгт итгэлтэй байна. Та бүхэн ч их зүйлийг мэдэж авахын төлөө санаачилгатай, идэвхи зүтгэл гарган   ажиллах хэрэгтэй.

 
Гэрэл зургийг mpa.mn

Дэлхий ертөнцийн энхийн төлөө зорилго нэгдэн манай сайхан оронд морилон саатсан энхийн элч Та бүхэн чөлөөт цагтаа нүүдэлчин соёл иргэншлийн хосгүй өвийг өнөө хэр нь уламжлан хадгалж үлдсэн Монгол туургатны зан заншил, ахуй соёл, түүх цадигтай бага ч болов танилцаарай. Ингэснээр Та бүхэн Монголын тухай  амьдралдаа үргэлжид дурсах гэгээн бүхнийг сэтгэлдээ тээж, улс гүрнүүдийн найрамдал, нөхөрлөлийн гүүр, эрхэм дотны анд нөхөд болох болно.

АНУ-ын Номхон далайн командлал энэхүү сургуульд цэргийн алба хаагчдаа илгээн оролцуулж байгаа улс орнуудын Зэвсэгт хүчний удирдлага, нийт энхийг сахиулагч Та бүхэнд дахин талархал илэрхийлж, цаашдын албанд тань их амжилт, амьдралд тань аз жаргал, эрүүл энх, сайн сайхан бүхнийг хүсэн ерөөе.

“Хааны эрэлд-2017” энхийг дэмжих ажиллагааны олон улсын сургуулийн үйл ажиллагаанд амжилт хүсье.

ДЭЛХИЙ ЕРТӨНЦ АМАР АМГАЛАН БАЙЖ,

ЭНХИЙГ САХИУЛАГЧДЫН ҮЙЛ ХЭРЭГ ХӨГЖИН БЭХЖИХ БОЛТУГАЙ" гэв.

 
Гэрэл зургийг mpa.mn

Нээлтийн ёслолын арга хэмжээнд Монгол Улсын Ерөнхийлөгч, Зэвсэгт хүчний Ерөнхий командлагч Х.Баттулга, УИХ-ын гишүүн, Засгийн газрын гишүүн, Батлан хамгаалахын сайд Б.Бат-Эрдэнэ, Монгол Улсын Ерөнхийлөгчийн Тамгын газрын дарга З.Энхболд, Зэвсэгт хүчний жанжин штабын дарга, дэслэгч генерал Д.Даваа, АНУ-аас Монгол Улсад суугаа Онц бөгөөд Бүрэн эрхт Элчин сайд Женифер Зимдал Галт, Номхон далай дахь АНУ-ын хуурай замын цэргийн командлалын хойд бүс хариуцсан орлогч дарга, хошууч генерал Рожер Нобел болон олон улсын цэргийн хамтарсан сургуульд оролцогч улс орнуудын Элчин сайд, дипломат ажилтнууд, цэргийн атташе, цэргийн багуудын бие бүрэлдэхүүн, гадаад, дотоодын хүндэт зочид, албаны бусад хүмүүс оролцов.