Бурхан багшийн Их дүйчэн өдрийн “Сэтгэл ариусахуй” ёслолын арга хэмжээ боллоо

Зуны эхэн сарын шинийн арван таван буюу Бурхан багшийн Их дүйчэн өдөр өнөөдөр тохиож байна.

Энэхүү өдрийг тохиолдуулан Монголын бурхан шашины төв, Гандантэгчэнлин хийд, нийслэлийн Засаг даргын Тамгын газар болон бусад сүм хийд, төрийн бус байгууллагууд хамтран “Сэтгэл ариусахуй” хэмээх арга хэмжээг зохион байгууллаа. 

Аз жаргалтай хотыг бий болгох нөхцөлийг бүрдүүлнэ

 

Уг арга хэмжээг нээж нийслэлийн Засаг дарга бөгөөд Улаанбаатар хотын Захирагч С.Батболд “Энэхүү билэгт сайн өдөр хүн зон сэтгэлийн амар амгаланг хурааж, үйлдсэн буян түмэнтэй арвиждагийг бясалган бие биедээ энэрэнгүй сэтгэлийг түгээж, элдэв үгсийг хэлэлцэн эв эетэй байж, бусдад урам зориг өгөн амар амгалан байх аваас бид бүхний өмнө тулгарч буй олон арван асуудлыг хамтын хүчээр шийдвэрлэх, аз жаргалтай хотыг бий болгох нөхцөлийг бүрдүүлнэ.

Бурхан шашинаар дамжуулан хотын соёлыг бий болгох, ард олныг гэгээрүүлэх, зан үйл, өв соёлыг хадгалан үлдэх, шашин соёлын арга хэмжээнд түшиглэсэн аялал жуулчлалын бүтээгдэхүүнийг бий болгох цаашлаад, хүмүүнлэг энэрэнгүй зөв сэтгэлтэй иргэнийг төлөвшүүлэн хөгжүүлэхэд шашины байгууллагуудын үүрэг оролцоо их юм.

Бурхан багшийн Их дүйчэн өдрийг өргөн тэмдэглэж, гүн хүндэтгэл үзүүлж буй Гандантэгчэнлин хийдийн хамт олон, хамтран зохион байгуулж буй сүм, хийд бусад албан байгууллагын хамт олонд гүн талархал илэрхийлье.

Та бүхний буян номын ажлыг үргэлж дэмжин ажиллах болно.

“Сэтгэл ариусахуй” уриан дор зохион байгуулж буй сүрт жагсаалд хүрэлцэн ирж, даган баясаж буй нийслэлчүүд та бүхний бодол оюун номын ариун хураар тэтгэгдэж, ашид амгалан байх болтугай” хэмээлээ.

 

Баярын үйл ажиллагааны сүрт жагсаал Гандантэгчэнлин хийдээс Д.Сүхбаатарын талбай руу, бясалгалын флашмоб төв талбайд болж, Гандантэгчэнлин хийдийн Да лам Х.Бямбажав 14 дүгээр Далай багшийн мэндчилгээг хүргэж, Хутагт хувилгаадын төлөөлөл Жонон Ханчэн гэгээн мэндчилгээ дэвшүүллээ.

Мөн Төрийн Соёрхолт найруулагч Н.Наранбаатар “Бурхан багшийн ариун дагшин газар" сэдвээр илтгэл тавьж, урлаг соёлын одод оролцсон арга хэмжээ болж өнгөрөв гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.