ОХУ ямар ч хамгаалалтын системийг нэвтлэх чадвартай пуужинтай болсноо зарлажээ

ОХУ-ын батлан хамгаалах яам стратегийн зэвсэглэлийн хувьд NATO-тай ижил түвшнийг хангах зорилгоор хэд хэдэн шинэ зэвсэг үйлдвэрлэлээс хүлээж авч байгаагаа зарласан байна.

Өнгөрсөн Лхагва гарагт ОХУ-ын батлан хамгаалахын сайд Сергей Шойгу парламентын гишүүдийн өмнө илтгэхдээ Оросын цөмийн зэвсэглэл шинэ Ярс тив хоорондын баллистик пуужин хүлээж авсныг мэдээлжээ. Энэ шинэ пуужин нь өнөөдөр ажиллаж байгаа ямар ч пуужингаас хамгаалах системийг нэвтлэх чадвартай гэнэ.

Үүнээс гадна гурван шинэ Борей ангиллын цөмийн шумбагч хөлөг үйлдвэрээс хүлээж авсан нь Булава тив хоорондын баллистик пуужингаар тоноглогдсон юм байна. Энэ шумбагч хөлгийн тоо 2021 онд долоо болж нэмэгдэнэ гэдгийг Шойгу мөн хэлжээ. 2021 онд Оросын арми шинэчилсэн алсын зайн Ту-160 бөмбөгдөгч онгоцнуудыг хүлээж авч эхлэх гэнэ.

Мөн удахгүй зэвсэглэлд шилжих шинэ Т-150 сөнөөгч онгоц, С-500 пуужингаас хамгаалах систем нь Оросын агаарын хүчин чадлыг эрс нэмэгдүүлнэ гэж Шойгу тайлбарласан байна.

Сүүлийн жилүүдэд ОХУ ба NATO-гийн сөргөлдөөн нэмэгдэж, хүйтэн дайны үеийн хэмжээнд хүрээд байгаа юм. Тиймээс талуудын аль аль нь цөмийн зэвсэглэлийн хүчин чадлаа нэмэгдүүлэхээ зарлаад байна.

Эх сурвалж: Associated Press