Дональд Трамп: Түүхэнд өмнө нь ямар ч улс төрчтэй надаас дор харьцаж байсангүй

Өчигдөр Коннектикут мужийн Нью Лондонд, АНУ-ын Эргийн Хамгаалалтын Академийн төгсөгчдийн өмнө ерөнхийлөгч Дональд Трамп үг хэлсэн байна.

Тэрээр хэлсэн үгэндээ “Би бат итгэлтэйгээр хэлэхэд, түүхэнд өмнө нь ямар ч улс төрчтэй надаас дор харьцаж байсангүй. Сүүлийн үед надтай хэрхэн харьцаж байгааг харцгаа. Ялангуяа хэвлэл мэдээллийнхэн” гэж гомдолложээ.

Гэхдээ Трамп “Та нар тэдний хүссэнээр байж болохгүй. Хэзээ ч, хэзээ ч бүү бууж өг!” гэж төгсөгчдөд зөвлөсөн байна. Сүүлийн өдрүүдэд Дональд Трампын эсрэг шүүмжлэл хэвлэлээр тасрахгүй байгаа. Ерөнхийлөгчийн үндэсний аюулгүй байдлын зөвлөх асан Майкл Флинний Оростой үүсгэсэн хэлхээ холбоог шалгаж эхэлсний дараа Холбооны Мөрдөх Товчооны дарга Жэймс Комиг Дональд Трамп ажлаас нь чөлөөлсөн гэх асуудал яригдаж байна.

Үүний дараа Трампыг ОХУ-ын гадаад хэргийн сайд Сергей Лавровтой өнгөрсөн долоо хоногт уулзахдаа тагнуулын нууц мэдээлэл задруулсан гэх мэдээлэл Вашингтон Пост сонинд гарсан юм.

Дээрх хоёр асуудлаас болоод Ардчилсан Намын хэд хэдэн хууль тогтоогч Трампын Москватай ямар холбоотой болохыг шалгах тусгай прокурор томилохыг хууль зүйн департментаас шаарджээ. Трампын өөрийнх нь Бүгд Найрамдах Намынхан ч түүнийг хүчтэй шүүмжилж эхэлсэн юм.

Эдгээр асуудлyудаас болоод Дональд Трампыг албан тушаалаас нь огцруулах (импичмент) тухай ч яригдаж болзошгүй байна.

Дональд Трампын тавьсан илтгэл:

Эх сурвалж: Independent