Хамгаалалтын газрын цагдаа амиа хорложээ
Цагдаагийн ерөнхий газрын Нийтийн хэв журам хамгаалах газрын Хамгаалалтын нэгдүгээр тасгийн албан хаагч Б амиа хорлосон хэрэг гарчээ. Талийгаач амиа хорлоход хүргэсэн шалтгаан дөрвөн настай охиноо хөнөөсөн хэрэгт холбогдсон Г.Маралмаатай холбоотой гэх мэдээлэл өчигдөр зарим хэвлэлд гарав.
Анхан шатны шүүхээс өнгөрсөн дөрөвдүгээр сард 23 жилийн ял сонссон Г.Маралмаа “Цагдаагийн албан хаагчид хүчиндүүлсэн” гэх гомдлыг гаргажээ. Түүний гомдлын мөрөөр Нийтийн хэв журам хамгаалах газрын Хамгаалалтын нэгдүгээр тасгийн албан хаагч Б-г холбогдуулан шалгаж мэдүүлэг авсан.
Талийгаач уг хэргийг хүлээн зөвшөөрөхгүй байсан бөгөөд ийм утгатай захиа бичиж үлдээгээд гэртээ амиа хорлосон гэнэ. Хэргийг Мөрдөн байцаах газрын Тусгай субъектийн хэлтсийнхэн шалгаж эхэлжээ.
